په ننګرهار کې د ۲.۵ میلیونه افغانیو په لګښت ۱۲۵ کورنیو لپاره د اوبو رسولو شبکه جوړه شوه
د کلیو بیارغونې او پراختیا وزارت د ولسي تړون ملي پروګرام له لوري د ننګرهار په دره نور ولسوالۍ کې د شیروم کلا اوسیدونکو لپاره د څه باندې ۲.۵ میلیونه افغانیو په لګښت د اوبو شبکه جوړه شوه.
دغې شبکې د ۹ نلکیو له لارې د سیمې ۱۲۵ کورنیو لپاره د څښاک اوبه برابرې کړې چې د لمریزې برېښنا په مټ ۲۵ زره لېتره د اوبو زېرمه هم لري.
ددې پروژې د رغنيزو چارو په جریان کې ځايي تخنیکي او نا تخنیکي کاریګرو لپاره ۱۸۷۹ کاري ورځې هم برابرې شوې.
د يادونې وړ ده، چې د ولسي تړون ملي پروګرام له لوري د ننګرهار ولایت په دره نور ولسوالۍ کې په بیلابیلو سکټورونو کې ۷۸ پروژې پلي کیږي، چې د سیمه والو ګڼې ستونزې به ورسره حل شي.
