د کلیو بیارغونې او پراختیا وزارت له لوري د ننګرهار په دره نور ولسوالۍ کې ۲۰۰۰ کورنیو ته بریښنا برابره شوه
د کلیو بیارغونې او پراختیا وزارت د برنامو معین پوپل حبیبي د یو لوړ پوړي دولتي پلاوي په ملتیا د ننګرهار په دره نور ولسوالۍ کې د اوبو بریښنا یوه پروژه ګټې اخیستنې ته وسپارله چې نږدې ۲۰۰۰ کورنیو، ۳۱ مسجدونو، ٢٠ کوچنیو او منځنیو فابریکو او ۷ ښوونځیو ته یی بریښنا برابره کړې ده .
د ۳۴۰ کیلو واټو په ظرفیت سره د غه پروژه د کلیو بیارغونې او پراختیا وزارت د افغانستان لپاره د پایداره انرژۍ پروګرام له لوري د ملګرو ملتونو پراختیایی ادارې UNDP په مالي مرسته د ۴.۴ میلیونه امریکایی ډالرو په لګښت بشپړه شوې چې پرون د کلیو بیارغونې او پراختیا وزارت معین پوپل حبیبي ، د ننګرهار والي ضیاء الحق امرخیل ، د ولسی جرګې غړي عبدالرووف شپون ، د ملګرو ملتو پراختیایي ادارې مرستیالې ، د ولایتي شورا غړو ، د ننګرهار کلیو بیارغونې پراختیا رییس ، د ولایتی شورا استازو ، د یوشمیر ادارو رییسانو او د دره نور ولسوالۍ قومي مشرانو له لوري د پټۍ په پریکولو سره ګټې اخیستنې ته وسپارل شوه .
د کلیو بیارغونې او پراختیا وزارت مرستیال وزیر پوپل حبیبي د دره نور ولسوالۍ اوسیدونکو ته ددې لوېې پروژې د تطبیق له امله مبارکي وویله اوزیاته یی کړه چې دا د بریښنا د تولید په برخه کې دهیواد په کچه ترټولو ستره پروژه ده چې ددې وزارت له لوري پلې کیږي. نوموړي زیاته کړه چی د کلیو بیارغونې او پراختیا وزارت له لوري په دره نور کې ۱۲پروژې بشپړې شوي او ۲۶ نورې پروژې روانې دي.
