په غور کې د ۲۲ میليونه افغانیو په ارزښت د ۱۴ پرمختیایي پروژو چارې بشپړې شوې
د کلیو بیارغونې او پراختیا وزارت د ولسي تړون ملي پروګرام له لوري د غور ولایت په شهرک او تولک ولسوالیو کې د ۲۲،۷۸ ميليونه افغانیو په ارزښت د ۱۴ پرمختیایي پروژو چارې بشپړې شوې.
په دې پروژو کې د څښاک د اوبو شبکې، د اوبو د چېنو رغونه، استنادي دیوالونه او د اوبو ذخیرو جوړولو شامل ول، چې ۱۴۲۰ کورنۍ به ترې ګټه اخلي.
د یادونې وړ ده، چې دا په غور کې د ولسي تړون ملي پروګرام له پیل تر اوس دوهم ځل پروژې وې، چې ګټې اخېستنې ته وسپارل شوې.
