د ۴۵ پرمختيايي پروژو هوکړه لیکونه د بدخشان، تخار، کندوز او بلخ ولایتونو له پرمختيايي شورا ګانو سره لاسلیک شول
د کليو بیارغونې او پراختیا وزارت د ليټاکا پروګرام له لارې د بدخشان شهر بزرګ ولسوالۍ، د تخار په چاه اب، دشت قلعه، ینګي قلعه ولسوالیو کې ، د کندوز په امام صیب ولسوالۍ او د بلخ ولایت د خلم ولسوالۍ له پرمختیایي شوراګانو سره د ۱۲۱ ميليونه افغانیو په ارزښت(۱،۶۲۹،۰۰۰.۰۰ډالره) د ۴۵ پرمختيايي پروژو هوکړه لیکونه لاسلیک کړل.
د کليو بیارغونې او پراختیا وزیر پوهنمل مجیب الرحمن کریمي د دې هوکړه لیکونو د لاسلیکولو پر مهال وویل، چې د ليټاکا پروګرام د جاپان هېواد د نړیوالې همکارې ادارې( جایکا) په مالي مرسته د افغان ـــــ تاجک په سرحدي سېمې کې پلي کېږي، چې د کورني اقتصاد په پیاوړتیا کې ماموریت ګټور دی.
د کليو بیارغونې او پراختیا وزیر زیاته کړه، چې د دې ۴۵ پروژو ورهاخوا چې ارزښت یې څه باندې ۱۲۱ ميليونه افغانیو ته رسیږي، د لیټاکا پروګرام په دوهم پړاو کې د ۲۰ نورو پروژو هوکړه لیکونه هم تیار دي، چې ژر به لاسلیک شي.
د کليو بیارغونې او پراختیا وزیر پوهنمل مجیب الرحمن کریمي همدرنګه وویل، چې د دې پروژو له لارې به ۴۵۵ کسانو ته تلپاتې دندې ایجاد شي او په مستقیم ډول به له دې پروژو څخه ۸۵۰۰۰ کسان د بدخشان، تخار، کندوز او بلخ ولایتونو په شپږ ولسوالیو کې ګټه اخلي. د دې پروګرام له لارې به د کلیوالو لومړنیو خدمتونو ته لاسرسی اسان شي او په کليو کې به شته زیربناوې که د صنعت، زراغت او تولید په برخه کې دې وده وکړي.
د ليټاکا پروګرام د خپل ډول لومړنۍ برنامه ده، چې له ۲۰۱۴ کال راهیسې خپل فعالیتونو د افغانستان او تاجکستان په سرحدي سېمو کې د اقتصادي او ټولنیز وضعیت د ښه کېدو په موخه کوي او مالي ملاتړ یې د جاپان هېواد د جايکا نړیوالې همکارۍ ادارې لخوا کېږي، چې اوس یې دوهم پړاو پیل شوی.
ياد پروګرام په افغانستان کې یې د کلیو بیارغونې او پراختیا وزارت او په تاجکستان کې یې د ملګري ملتونو د پرمختیايي پروګرام لخوا پلي کېږي.
