د کلیو د بیارغونې او پراختیا وزارت محترم وزیر معرفي شو
د عالیقدر امیر المؤمنین حفظه الله تعالی د حکم پربنسټ الحاج ملا عبداللطیف منصور صاحب د کلیو د بیارغونې او پراختیا وزارت د وزیر په توګه ټاکل شوی وو، نن د یوې غونډې په ترڅ کې د دغه وزارت کارکوونکو ته د چارو ادارې مرستیال مولوي سیف الرحمن تائب صاحب له خوا ورپيژندل شو.
په دې غونډه کې د چارو ادارې مرستیال مولوي سیف الدين تائب صاحب، د کلیو د بیارغونې او پراختیا وزارت مخکینی محترم وزیر الحاج ملا محمد یونس اخندزاده صاحب، د کلیو د بیارغونې او پراختیا وزارت محترم وزیر الحاج ملا عبداللطیف منصور صاحب، د وزارت مالي او اداري مرستیال الحاج مولوي عبدالرحمن حلیم، د پلان او پالیسي مرستیال مولوي شرف الدين مسلم ،مرکزي رئیسانو او د وزارت کارکوونکو ګډون کړی وو.
دغه جوړه شوې غونډه د قرانکریم د څو مبارکو ایتونو په تلاوت سره پیل شوه، د غونډې په پيل کې د کلیو د بیارغونې او پراختیا وزارت مخکیني محترم وزیر الحاج ملا محمد یونس اخندزاده صاحب ګډونوالو ته ارزښتناکه وینا وکړه او وویل: په تیرو شلو کلونو کې د اشغال پر وړاندې له اسلامي امارت سره د ولس همکاري او خدمتونه دا ایجابوي چې اسلامي امارت خپل ولس ته په هره برخه کې خدمت وکړي او د ستړیا احساس ونکړي.
ورپسې د چارو ادارې مرستیال مولوي سیف الدین تائب صاحب په یاد وزارت کې د الحاج ملا محمد یونس اخندزاده صاحب د کړنو او فعالیتونو د ستایلو ترڅنګ وویل: زموږ نظام کې صداقت او وفاداري رغنده رول لري او د اسلامي امارت مکلفیت دی ترڅو په محرومو او لرو پرتو سیمو کې خپل ولس ته پراختیايي پروژې پلي کړي.
د غونډې په پای کې د کلیو د بیارغونې او پراختیا وزارت محترم وزیر الحاج ملا عبداللطیف منصور صاحب وینا وکړه او وویل: له نیکه مرغه موږ د داسې نظام شاهدان یو چې ټولې چارې يې د اسلامي شریعت په رڼا کې ترسره کیږي او زموږ بریالیتوب د آمرینو په اطاعت کې دی، او کارکوونکو ته يې سپارښتنه وکړه چې خلکو سره ښه چلند او کارونه يې پروخت ترسره کړي.
یاده غونډه د وزارت د مالي او اداري مرستیال الحاج مولوي عبدالرحمن حلیم په دعائیې سره پای ته ورسیده.
