د کاپيسا ولایت په حصه دوم کوهستان ولسوالۍ کې د اوبو رسولو د یوې شبکې د پروژې چارې پیل شوې
د کلیو د بیارغونې او پراختیا ریاست تر چتر او نظارت لاندې، د (UNOCHA) دفتر په مالي مرسته او د (OCCD) مؤسسې په تخنیکي همکارۍ د کاپيسا ولایت د حصه دوم کوهستان ولسوالۍ په ظفرخیل قزاق کلي کې د ( 6,873000 ) افغانیو په لګښت د سولر پمپ سیسټم سره سمبال د اوبو رسولو د یوې شبکې چارې پیل شوې.
په یاده پروژه کې د (۱۱۰) متر په عمق سره د ژورې څاه کیندل، د (۱۵) متر مکعب په ظرفیت سره د یوې کانکریټي اوسپنې ذخیرې جوړول، د (۸) صحي مبرزونو جوړول، د څښاک پاکو اوبو د (۷) حلقه څاګانو بنسټیز ترمیم او همدارنګه د دغه ولسوالۍ د اته پراختیايي شوراګانو کلیو کې د روغتیايي کیټونو ویش او د صحي ورکشاپونو دایرول شامل دي چې د یادې پروژې په بشپړیدو سره به د نوموړي کلي (۲۷۰۰) تنه اوسیدونکي په مستقیم ډول د څښاک پاکو اوبو ته لاسرسی پیدا کړي او د نوموړو کلیو (۴۰۰) تنه اوسیدونکو ته د روغتیا ساتنې روزنې او صحي کیټونو ویشل کیږي.
