په لغمان ولایت کې د سړکونو د بیارغونې چارې بشپړې او ګټې اخیستنې ته وسپارل شول
د کلیو د بیارغونې او پراختیا ریاست په تخنیکي همکارۍ او نظارت، د نړیوال خوراکي پروګرام (WFP) په مالي مرسته او د (FGA) مؤسسې له خوا د لغمان ولایت په علینګار او بادپښ ولسوالیو کې د څه باندې (90) ميلونه افغانیو په لګښت د (80) کیلومترو په اوږدوالي سره د سړکونو د بیارغونې چارې بشپړې او ګټی اخیستنی ته و سپارل شول.
د لغمان ولایت د کلیو د بیارغونې او پراختیا رئیس مولوي محمد ظاهر(زرکمر) په وینا: د یادو پروژو چارې چې د علینګار ولسوالۍ د کلمان کلي 12 کیلومتره سړک، د سنګر کلي 8 کیلو متره سړک، د ساو کلي 10 کیلو متره سړک او د بادپښ ولسوالۍ په ګړوچ ، اندروړ او شاه ګلیان کلیو کې د 50 کیلومتره سړک بیارغول شامل دي، د نهه میاشتو په موده کې بشپړې شوې چې په بشپړیدو سره يې د سیمی زرګونه کورنیو ته د تګ او راتګ اسانتیاوی برابرې شوې دي. همدارنګه په دغه پروژه کې (1000) تنو کاریګرو ته د کار زمینه برابره شوې وه.
