په دایکندي ولایت کې د اوبو رسولو (۴) شبکو د جوړولو چارې پیل شوې
د کلیو د بیارغونې او پراختیا وزارت د مالي او اداري مرستیال الحاج مولوي عبدالرحمن حلیم له خوا د دایکندي ولایت په پاتو ولسوالۍ کې د څه باندې (۲۹،۹) میلیونه افغانیو په لګښت د اوبو رسولو (۴) شبکو د جوړولو چارې د یوې غونډې په ترڅ کې رسماَ پیل شوې.
د یادو شبکو په پرانیست غونډه کې د دایکندي ولایت والي الحاج مولوي تورجان «احمدی»، د وزارت د اوبو رسولو او روغتیا ساتنې رئیس انجنیر حبیبالرحمن مبارز، د دغه ولایت د کلیو د بیارغونې او پراختیا رئیس ملا ضیاالله «خادم»، د سکتوري ادارو رئیسانو، سپین ږیرو او مخورو ګډون کړی وو.
په دغو شبکو کې د (۴) څاګانو کیندل، د (۲۰ او ۴۰) متر مکعب په وړتیاوو د پاکو اوبو (۴) ذخیرو جوړول، د (۱۷۵۲۴) مترو په اوږدوالي پايپ غځول، د (۶۰) سولر تختو او (۱۹۲) شیردهنونو نښلول شامل دي.
د یادو شبکو د کار په بهیر کې به لسګونه تنه کاریګرو ته د کار زمینه برابره او په بشپړیدو سره به یې د نوموړې ولسوالۍ (۵۲۳) کورنۍ د څښاک پاکو اوبو ته لاسرسی پیدا کړي.
