د کلیو د بیارغونې او پراختیا وزارت سرپرست وزیر د زابل ولایت د لسو ولسوالیو له ولسوالانو سره وکتل
د کلیو د بیارغونې او پراختیا وزارت سرپرست وزیر الحاج ملا محمد یونس اخندزاده نن له غرمې وروسته په خپل کاري دفتر کې د زابل ولایت د لسو ولسوالیو له ولسوالانو سره لیدنه وکړه.
په یاده لیدنه کې د زابل ولایت ولسوالانو وزیر صاحب ته د خپلو ولسوالیو ستونزې بیان کړې، دوی وویل چې د تېرې ادارې په وخت کې زابل ولایت ډیر ځپل شوی او هیڅ پاملرنه نه ده ورته شوې چې اوسیدونکي يې د سړکونو د خرابوالي او د څښاک پاکو اوبو له نشتوالي سره مخامخ دي.
دوی له محترم وزیر صاحب څخه غوښتنه وکړه څو د سړکونو د جوړولو او د څښاک پاکو اوبو د برابرولو استنادي دیوالونو د جوړولو په برخه کې ورسره مرسته وکړي.
د کلیو د بیارغونې او پراختیا وزارت سرپرست وزیر د ښه را غلاست تر څنګ د زابل ولایت د ولسوالانو ستونزې په غور واوریدې او و یې ویل: د کلیو د بیارغونې او پراختیا وزارت به د خپلو امکاناتو سره سم د همدې ولایت ستونزو ته رسیدنه وکړي.
