په ننګرهار کې ٨٠٦ پرمختیایي پروژې روانې دي
د کلیو بیارغونې او پراختیا وزارت د برنامو معین پوپل حبیبي په ننګرهارکې د کلیوالي پرمختیایی شوراګانو د ستونزو د اوریدو په ولسي ناسته کې وویل، چې تېر کال په ننګرهار کې ٣٤٧ پروژې بشپړې شوې دي او ٨٠٦ پروژو چارې روانې دي.
ښاغلي پوپل حبیبي وویل، چې د افغانستان د اوبو د مدیریت وخت دی او په دې برخه کې د ولسونو ونډه ډیره مهمه ده« د کلیو بیارغونې او پراختیا وزارت د ستاسې ( د کلیوالي شوراګانو) په مټ د کوچنیو بندونو، کانالونو او چيک ډېمونو د جوړولو مسوولیت لري، چې کلیوالي شوراګانې یې باید د کېفیت، څارنې او ساتنې په برخه کې خپل مسوولیت ادء کړئ»
د ولسمشرستر سلاکار او د ننګرهار والي ضیاالحق امرخیل له شوراګانو څخه غوښتنه وکړه چې پروژې په ښه کیفیت او کمیت سره پلې کړي.
د ولسوالیود شوراګانو په استازیتوب حاجي سمیع الله ، ملک محکم خان ، ملک جهانزیب او یو شمیر نورو قومي مشرانو خبرې وکړې او د وزارت له کارونو څخه یې خوښي وښوده او د خپلو سیمو ستونزې یی شریکې کړې.
