په بغلان کې د اوبو لګولو د کانال او استنادي پروژې ګټې اخیستنې ته وسپارل شوې
د کلیو د بیا رغونې او پرمختیا وزارت د سیمه ییز پروګرام له لوري په بغلان ولایت د مرکزي بغلان ولسوالۍ په سلام خیلو کلي کې د څه باندې ۲ میلیون افغانیو په ارزښت د ۱۸۷ مترو په اوږدوالي د اوبو لګولو د کانال او د ۶۴ مترو په اوږدوالي د استنادي دیوال پروژې بشپړې او ګټې اخیستنې ته وسپارل شوې.
د دغو پروژو د تطبیق پر مهال چې د کرنې د نړیوال پرمختیايي صندوق (IFAD) له لوري تمویل شوې ۱۲۱۱ کاري ورځې رامنځته شوي او اوس چې دغه پروژې بشپړې شويدي د سیمې ۲۱۰۰ اوسیدونکي له دغو پروژو ګټه پورته کوي. د یادونې وړ ده چې دغو پروژو د سیمې ګڼ شمیر کرنیزې ځمکې او باغونه د اوبو لګولو تر منظم پوښښ لاندې راوستي دي.
