په کاپیسا ولایت کې ۵۴۰ کورنیو ته د څښلو پاکې اوبه برابرې شوې
د کليو بیارغونې او پراختیا وزارت د اوبو رسولو د ملي پروګرام له لوري د کاپیسا ولایت د مرکز محمود راقي اړوند په «قول بابر» او د حصه اول کوهستان ولسوالۍ په «جلدک» کليو کې د څښلو د اوبو د دریو پروژو چارې بشپړې .
د اوبو رسولو په دغو درېو پروژو کې په «جلدک» کلي کې د څښلو د اوبو د یوې لمریزې شبکې جوړول او د یوې ژورې څاه کیندل او په «قول بابر» کلي کې په لاسي بمبو سمبال د درېو څاه ګانو جوړول شامل وو.
په دغو پروژو باندې څه کم پنځه ميليونه افغانۍ لګښت شوي چې د دولت له بودجې څخه ورکړل شوې. د یادو پروژو په بشپړېدو سره په ذکر شویو کلیو کې د شاوخوا ۵۴۰ کورنیو لپاره د څښلو پاکې اوبه برابرې شوې.
