په کابل کې د کلیو بیا رغونې او پراختیا وزارت سرپرست وزیر الحاج ملا محمد یونس اخندزاده د خپل کار په دفتر کې د ایران هېواد لپاره د افغانستان اسلامي امارت له سفیر مولوي فضل محمد حقاني او مل پلاوي سره وکتل
په دې ناسته کې چې د کلیو د بیارغونې او پراختیا وزارت مالي او اداري مرستیال محترم مولوي عبدالرحمن حلیم صاحب هم ګډون درلود، محترم حقاني صاحب په ګاونډي هېواد ایران کې د مهاجرو افغانانو د وضعیت په اړه خپل مالومات شریک کړل او د هغوی ستونزې یې یادې کړې. همدارنګه، نوموړي په ایران کې د افغان بنديانو پر وضعیت رڼا واچوله او زیاته یې کړه چې زموږ د سفارت ټول کارکوونکي شپه او ورځ د خپلو هېوادوالو په خدمت کې بوخت دي.
هغه وویل چې هره ورځ د اړتیاوو پر اساس څومره مراجعین چې زموږ سفارت ته راځي، د هغوی کارونه هېڅکله د سبا ورځې لپاره نه پرېږدو.
ښاغلي وزیر صاحب د افغان سفير د خدمتونو او د افغانانو ستونزو ته د رسیدو هڅې ډېرې وستایلې.
نوموړي د هغوی هڅې د قدر وړ وبللې او دعا یې وکړه چې الله تعالی هغوی ته توفیق ورکړي څو د خپلو مهاجرو هېوادوالو په خدمت کې لا زیاته بریا ترلاسه کړي.
