د کلیو د بیارغونې او پراختیا وزارت د اوبو رسولو او روغتیا ساتنې ریاست د پروژو د سروې، ډیزاین او تطبیق تخنیکي ورکشاپ پای ته ورسېد
د کلیو د بیارغونې او پراختیا وزارت په کلیوالي سیمو کې د اوبو رسولو او روغتیا ساتنې ریاست، د یاد ریاست د ولایتي انجنیرانو او کارکوونکو د وړتیا د لوړولو په موخه، د اوبو رسولو د پروژو د سروې، ډیزاین او تطبیق تر عنوان لاندې څلور ورځنی ورکشاپ نن د یوې غونډې په ترڅ کې پای ته ورسېد.
په یاده غونډه کې د کلیو د بیارغونې او پراختیا وزارت سرپرست وزیر الحاج ملا محمد یونس اخندزاده، د اوبو رسولو او روغتیا ساتنې رئیس مولوي بخت منیر محمد له (۱۷) ولایتونو څخه د اوبو رسولو ریاست واش آفیسران، انجنیرانو او کارکوونکو ګډون کړي وو.
غونډې ته د کلیو د بیارغونې او پراختیا وزارت سرپرست وزیر الحاج ملا محمد یونس اخندزاده خپله ارزښتناکه وینا وکړه او وویل: د یاد ورکشاپ موخه د اوبو رسولو د ولایتي انجنیرانو او کارکوونکو د ظرفیت لوړول وو ترڅو وکولی شو د اوبو رسولو پروژې په ښه کیفیت پلې او د هېواد کلیوالي خلکو ته ښه خدمات وړاندې کړو.
دغه راز د وزارت سرپرست وزیر زیاته کړه چې دنده یو امانت دی او باید په صادقانه ډول سره ترسره شي او د یاد ورکشاپ د اهمیت او ارزښت په پام کې نیولو سره، له ګډونوالو څخه يې وغوښتل چې د دې ورکشاپ څخه اعظمي استفادې وکړي او د اوبو رسولو د پروژو د تطبیق پر مهال ترېنه ګټه واخلي.
یاده غونډه د کلیو د بیارغونې او پراختیا وزارت د اوبو رسولو او روغتیا ساتنې رئیس مولوی بخت منیر محمد په دعائیه سره پای ته ورسیده.
