په کاپیسا کې د ۲۰ میلیونه افغانیو په ارزښت د ۱۴ پرمختیايي پروژو کار پیل شو
د کلیو بیا رغونې او پراختیا وزرت له خوا په کاپیسا کې د ( له کاسا- ۱۰۰۰ څخه د ټولنې ملاتړ) تر نوم لاندې د ۲۰ میلیونه افغانیو په ارزښت د ۱۴ پرمختیايي پروژو کار پیل شو.
د استنادي دیوالونو او د اوبو د کانالانو جوړول په دې پروژو کې راځي چې ۱۷۸ شوراګانې په کې ښکیلې دي.
د کاپیسا د کلیو بیا رغونې او پراختیا رییس په وینا دا پروژې د کاسا- ۱۰۰۰ ثمره ده چې د کاپیسا له ۶ ولسوالیو تیریږي سر بیره د حیاتي زیربنايي پروژو په پلي کولو به په دغو ولسوالیو کې سلګونو کسانو ته د کار زمینه هم برابره شي او په کلیو کې به د بې وزلۍ د کچې د ښکته کولو او کارموندنې په برخه کې هم ګټورې پریوځي.
یاده دې وي چې کاپیسا ولایت د کاسا- ۱۰۰۰ پروژې د لیږد دهلیز دی او د ټاکل شویو اصولو پر بنسټ دا پروژه د لیږد له کرښې دواړو غاړو ته د ۲ کیلو متره په واټن لرې پرتو سیمو ته د ښاري شبکې څخه د زیر بنايي پروژو په برخه کې بریښنا هم چمتو کوي.
