د ننګرهار په شینوارو ولسوالیو کې ۵ عام المنفعه بیلابیلې پروژې ګټې اخیستنې ته وسپارل شوې.
د کلیو د بیا رغونې او پرمختیا وزارت د سیمه ییز پروګرام ۵ عام المنفعه بیلابیلې پروژې د نږدې ۱۵ میلیون افغانیو په ارزښت د ننګرهار په شینوارو ولسوالیو کې بشپړې او ګټې اخیستنې ته سپارل شوي او د نږدې ۱۳۳ میلیون افغانیو په ارزښت بیلابیلې عام المنفعه نورې پروژې د بشپړیدو په حال کې دي.
د دغو پروژو په لړ کې نږدې ۶۴ زره کاري ورځې رامنځته او نږدې ۹۰ زره ځايي اوسیدونکي به ترې ګټه پورته کړي.
دغه پروژې چې له ملي بودیجې او ایټالیا له لوري تمویل شوي په ترڅ کې یې د اوبو لګولو کانالونه او استنادي دیوالونه جوړ شوي چې د عام المنفعه بیلابیلو ودانیو تر څنګ یې ګڼ شمیر کرنیزه ځمکه هم د سیلابونو له اټکلي زیان څخه ژغورلې ده.
د کلیو د بیا رغونې او پرمختیا وزارت سیمه ییز پروګرام په راتلونکي کال کې هم په پام کې لري چې د شینوارو په شپږو ولسوالیو کې د عام المنفعه بیلابیلو پروژو د تطبیق لار پرانیزي.
