په تخار کې د ۵.۵ میلیونه افغانیو په لګښت ۴۵۰ کورنیو ته د څښاک پاکې اوبه برابرې شوې
د کلیو بیارغونې او پراختیا وزارت په کلیوالي سیمو کې د اوبو رسولو او حفظ الصحې پروګرام د ۵.۵ میلیونه افغانیو په لګښت د تخار ولایت د روستاق ولسوالۍ په کیوان جدید کلي کې شاوخوا ۴۵۰ کورنیو ته د څښاک پاکې اوبه په نلونو کې برابرې کړې.
د اوبو رسولو ملي پروګرام په پورته ذکر شوي کلي کې د اوبو رسولو یوه لمریزه شبکه جوړه کړه چې په دې وروستیو کې د ځايي خلکو ګټې اخیستنې ته وسپارل شوه.
په دغه پروژه کې د ۳۰ تختې سولر اخیستل او نصبول، د سولرونو لپاره د یوې احاطې او یوې هسکې زیرمې جوړول، د څه باندې ۷۸۰۰ متره اوږدې شبکې غځول او د ۲۰۵ نلکو او نورو اړینو وسایلو نصبول شامل وو.
د یادونې وړ ده چې ددغې پروژې د جوړولو چارو دغه راز د ځايي خلکو لپاره شاوخوا ۴زره او ۶۰۰ کاري ورځې هم رامنځته کړې.
